敬請各位朋友來去全新的「老刀烏白講」網頁繼續來聽我烏白講，最後愛麻煩各位朋友變更你的「書籤」抑者是「我的最愛」內底的網址。若有造成你的不便，老刀佇遮來共你話一聲失禮。

今日再度收著 Captain FTP 開發小組的來批，通知講新的 5.1 版已經正式推出。你若欲體驗 Captain FTP 5.1 的強大功能，歡迎去 Captain FTP 官方網站下載新版轉來用。

因為頂篇講著「系統運作無正常的慢，滑鼠不時出現七色彩球游標。連『拍入密碼』遐簡單的動作仝款愛等半晡」，按照過去的經驗，應該是硬碟無正常。所以老刀共化解的步數攏總寫佇下跤：

1. 共硬碟拆出來，鬥入去另外一台 Windows PC 內底。
2. 用 hddguru.com 提供的 "Hard Disk Low Level Format Tool 2.36" 來共硬碟做 Low-Level Format。
3. 鬥轉去 PowerMac G3 用「磁碟工具程式」重新做 HFS+ 分割區。
4. 閣再重灌 Mac OS X 佮其他應用軟體。

以上著是老刀的報導，你咁有臆著？

最後補充一點，網路頂頭有真濟專門做 Low-Level Format 的免費軟體；hddguru.com 提供的工具，是我試過較好用的其中一款。你嘛會凍掠其他仝款用途的軟體來代替。

（Captain FTP 5.1 新功能之一：燒錄 CD/DVD 光碟）

Captain FTP 是 Mac OS X 下跤真受歡迎的 FTP 軟體。最近老刀收著 Captain FTP 開發小組（老刀是組員兼正體漢文翻譯者）寄來的 5.1 測試版，發現這是一个予人歡喜的版本。新的 Burn Disc Manager 會凍予你用親像 Toast、Nero 的方式，直接共下載檔案規批燒入 CD/DVD。雖然 Burn Disc Manager 並無提供「拷貝光碟」的功能，但一般使用上濟的「資料光碟」燒錄已經會凍直接佇 Captain FTP 5.1 內底做，真是足方便的代誌。

新的 5.1 版除了增加 Burn Disc Manager 以外，其他的新功能包括：

1. 「選擇性同步」予使用者對「同步」項目內底，刪除檔案/檔案夾。
2. 抹除光碟片的資料。
3. 支援 iDisc support：使用預先設定的選項組合，成功連接至 iDisc

大導演李安佇義大利得著金獅獎了後，「色．戒」這齣劇佇短短規日內，已經變做最近上熱門的話題。因為有朋友送我招待券的關係，頂禮拜六暗時老刀下班了後，嘛去電影院佮別人鬥鬧熱。

這齣劇雖然老刀認為劇情平平無衫希罕，予大家討論上濟的話題：易先生（梁朝偉飾）佮王小姐（湯唯飾）的三場露點激情床戲、劇內底演員用心計較、你去我來的精彩對白，攏總毋是老刀欲討論的重點。「色．戒」予老刀印象上深的所在，是重建 1940 年代上海街景、服裝，閣有撮影師掌鏡、取景的功力，看著電影掌鏡技巧，予我佇翕相取景方面有新的啟示。想欲提升撮影、取景功力，觀摩大師作品果然重要。

無論按怎，毋管你是用啥角度來看「色．戒」，這齣戲充滿會使予人研究的所在，真正是一齣回味無窮、值得你看的影片。

（新的 OpenVanilla 0.8.0 支援使用 wildcard 字根【* ?】）

老刀今日終於收著 OpenVanilla Team 主持人 lukhnos 傳來上新的 OpenVanilla 0.8.0 beta，趕緊貼規張圖予大家參觀。正式版本的 OpenVanilla 0.8.0 應該最近著會推出。

新的選字窗除了嫷以外，嘛有「動畫」特效。另外，內建的「酷音」輸入法有真大的改進（輸入法核心改寫、收錄 unicode 漢字、改進佇 Finder 下跤當機的問題），真正讚啦。

OpenVanilla 0.8 版的新功能（摘自 OpenVanilla Team 成員 zonble 的網路相簿）

老刀佇咧 Le Park Cafe 參加老地方冰果室的時陣，定定有朋友來關心 OpenVanilla (OV)「香草輸入法框架」新版的開發進度（香港來的羅先生，我著是咧講你啦，哈哈）。今日收著 OV 計畫的主持人 lukhnos 來批，邀請老刀加入包括佇 OV 套件內底的「行列輸入法」新版模組測試。聽著 OV 新版已經進入測試階段，這个消息真是予人歡喜。

OV 是支援 Mac OS X、Windows、Linux 平台的輸入法框架，標準套件內底已經收入將近 20 款中文（漢字）佮符號輸入法（另外猶有「補充套件」提供閣卡濟款的輸入法，嘛提供會凍予使用者家己創造新輸入法的功能），真正是老刀強力推薦，一定愛安裝的免費軟體！

老刀的「老白」——乳白色 PowerMac G3（內底有 Mac OS X 10.4.9 系統）頂禮拜升級 QuickTime 7.2 佮 iTunes 7.4 了後，重新開機著死翹翹，等半點鐘嘛只存白底灰蘋果畫面娘娘。改用另外一粒硬碟內底的 Mac OS 9.2.2 開機了後，佇 Finder 下跤看 OS X 這粒硬碟，發見內底資料攏總佇咧，真好佳哉。

資料解救出來了後，決定來共伊重灌 OS X 10.4，頭一擺佇安裝半途竟然共我當機！灌第二擺雖然成功，但嘛是怪怪：系統運作無正常的慢，滑鼠不時出現七色彩球游標。連「拍入密碼」遐簡單的動作仝款愛等半晡，真正等死我這个老伙呀~~~

當然最後「老白」是回復正常啦（而且順煞升級到 10.4.10 系統），但老刀暫且毋講出治療過程，予大家來臆看覓呀，做伙來練功提升救急的能力。

「老白」的配備：

1. PowerMac G3/233，換 G3/300 CPU了後，超頻到 433MHz。
2. 768MB RAM。
3. Seagate 20GB IDE 硬碟（灌 Mac OS X 10.4.9）、IBM 4GB SCSI 硬碟（灌 Mac OS 9.2.2，另外有 XPostFacto 4，用來灌 OS X 10.4）。
4. Pioneer DVR-105 燒錄機。
5. Mac OS X 10.4 DVD，另外閣有 Mac OS X 10.4.10 combo update（用來升級系統用）。

前規日來台北、新竹演講造成轟動的 Steve Wozniak（蘋果 (Apple) 電腦公司的創始人之一，嘛是世界出名的個人電腦 Apple I、Apple II 發明者），老刀特別請假去「面聖」聽伊演講。講起按怎創造個人電腦 (Apple I、Apple II)、如何佮 Steve Jobs 做伙拍天下、後來怎樣投入兒童電腦教育，對錯過彼咧年代的少年家來講，嘛是未歹啦。你哪想欲閣較瞭解 Apple 公司初創早期發生的歷史，會凍去買一本 Steve 最近的大作 "iWoz" 來看。

演講會後是簽書會的時間，但是除了簽 iWoz 以後，親像相片這款，紮 PowerBook、iBook、 (MacBook/MacBook Pro、iPod 予伊簽名的朋友嘛真濟。老刀當然嘛愛把握這咧機會，來翕規張相片當做紀念。

（電腦變做畫板，網友「搖搖」畫出有藝術感的作品）

這禮拜的老地方冰果室聚會，參加的朋友實在真濟，佇我十點離開的時陣，猶有 Paper、Ivy 一寡人入場。Joan 想欲請我教伊規步 Excel 的秘訣，但是伊咧無盈開講，希望後擺有機會會凍來收 Joan 做學生。怪醫這禮拜本來欲去翕天星，無奈天氣毋好，帶著伊的 Canon EOS 5D 專業數位相機佮 Canon EF 85mm f/1.2 人像名鏡專工來參加這擺聚會。

另外，音樂家超然兄後禮拜三著欲轉去米國，祝福伊有快樂的旅途。

相關的紀錄佮討論，請參考：
我的 flick 相簿（攏總 47 張相片）
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明