夢生(Yuh-ru/Dyertung)的母錄(blog/部落格):)

目錄

致謝. 243

前言. 243

啥麼是半條蕃薯. 244

聲韻ｅ問題. 246

聲調問題. 248

文字ｅ問題. 249

語言標準化ｅ問題. 251

語言使用心態ｅ問題. 252

鄉土教育ｅ問題. 253

鄉土教育ｅ教學時數問題. 254

政治「統一」問題. 255

結論. 256

後記：. 257

致謝

    非常感謝董忠司 教授特別敲電話來邀請我這位無名小卒來寫一篇有關臺灣語言發展學術研討會ｅ文稿，並且希望我ma會凍來參加會議，另外閣特別寄徵稿啟事hoo我本人。對一名無名小卒仔來講，這款ｅ盛情kah受大人物ｅ看有起，實在hoo人感覺心內真正溫暖 (尤其是ti我已經算是 “隱居” ti南部將近欲三年a)。假使咱ｅ社會每一個會曉講母語ｅ人攏會凍ti人格上hoo人尊重kah重視，相信ti咱這塊土地ｅ本有語言就未遮呢緊有危機產生；若每一位前輩攏會凍按呢重視講母語ｅ後輩，當然咱ｅ母語ti時間ｅ十字路口就會有未來。

前言

    若是照會議ｅ性質來講，這篇文稿一點仔ma未凍算是學術論文，因為學術講求ｅ是頂真ｅ態度，所寫出來ｅ文句愛講求百分之百ｅ正確，上好愛有引經據典，未使有m對ｅ所在以及信口開河，親像音韻符號ｅ表示、標調符號系統、漢字ｅ用字方面......等等，上重要是ti論點方面未凍有錯誤ｅ所在。另外，若是欲有學術性ｅ話，上好愛用華語來寫，若是閣欲有國際性ｅ水準，當然是用英文來寫才會凍顯示出水準hoo人來大開眼界。

    所以，這篇文稿ｅ觀點若欲用以上ｅ標準來講，根本無符合任何一個條件。這篇並無做任何學術性ｅ研究；也無做任何ｅ田野調查；無讀任何ｅ其他作者ｅ作品；當然ma無可能針對任何學術派別提出批評，但是有可能ti「言者無心，聽者有意」ｅ情形下，引起某一個派別ｅ抗議。唯一希望ｅ是這篇文稿內底ｅ內容有百分之七十以上ｅ觀點是錯誤ｅ，甚至希望這篇文稿ｅ觀點上好是一派胡言。

啥麼是半條蕃薯

    每一個住ti台灣ｅ台灣人，攏會加減用蕃薯來比喻咱台灣人。因為台灣島嶼ｅ外形有淡薄仔像蕃薯，加上蕃薯是咱以早經濟蕭條ｅ時，散赤人賴依生存ｅ食物，所以才用蕃薯來講咱這塊土地ｅ人。因為外來政治文化ｅ衝擊之下，ti語言上產生了真特殊ｅ現象，就是本土ｅ語言無法度得著公平ｅ待遇，致使著這塊土地ｅ人，新生ｅ一代，漸漸無認同家己ｅ母語，甚至將母語放掉，ti本土文化內涵上干單會凍算講是半個台灣人，甚至會凍講無夠一半ｅ一半。當然ti這篇文章是以母語ｅ使用角度來講咱家己，半條蕃薯ｅ意思就是英文所講ｅ"semi-speaker"(半語言使用者)。

    ti這個所在並無來定義"semi-speaker"ｅ意思，因為無仝款ｅ觀點就會有無仝款ｅ定義，咱並無法度講具備外濟語言基本詞彙ｅ人是或是m是"semi-speaker"，咱嘛未凍以某一個人的標準做定義，更加未凍以本人做標準。因為每一個人所生長ｅ家庭生活背景、所在、性別、職業、社會地位以及宗教信仰......等等攏無仝款，因此，咱所使用ｅ語言詞彙就無仝。另外，咱嘛無法度以使用時間ｅ長短來做定義。不過，我個人相信只要ti語言使用轉換(code switching)上，親像台語、客語、原住民語和官定語言華語ｅ使用轉換，若是ti心態上真明顯認為自己ｅ母語是歹聽ｅ、無水準ｅ以及根本未凍用ti公開場合ｅ人，我相信伊是百分之百ｅ母語"semi-speaker"，也因為母語"semi-speaker"間接造成一寡母語ｅ衰落和死亡，也因此引起民間語言運動團體以及母語研究學者ｅ嚴重關懷，發起拯救母語ｅ活動。表面上母語拯救活動已經造成了風潮，但是實際ｅ運作活動所會凍深入ｅ層面以及闊度攏令人有淡薄仔耽心和煩惱。相信這也就是本研討會需要語言學家、語文教育學家、語文工作者、語文教師、和全國有識之士來共同討論挽救母語應當愛做ｅ空課。

    當然ti母語運動中也產生了真濟ｅ問題，當然這是會議中需要回顧與討論。

聲韻ｅ問題

    因為觀點ｅ無仝，致使著台語聲韻符號ｅ標示上出現真濟派系，每一個派系攏聲稱家己ｅ是理想ｅ一套，當然大部分ｅ聲韻標示創作者基本上攏識一寡聲韻知識，嘛會曉國際音標IPA，但是共同的特點攏是無考慮著標音符號攏是愛受著工具ｅ限制，如果每一個標音者所用ｅ工具只是一枝筆和一張紙，相信每一個人攏來用國際音標來表示絕對未有爭論。因為ti紙上來表示任何上標符號或者是附加符號攏真方便，甚至標示者個人發明ｅ符號也可以，ti使用上攏未有啥麼問題來發生，親像......等等，但是ti實際上卻有真濟問題產生，遮ｅ問題致使無仝派系ｅ台語音標標示者產生了爭論不休ｅ論戰。

    假使每一個音標標示者攏加減會曉國際音標，為啥麼猶看未出派系爭論戰其實是無需要ｅ？因為咱真清楚看會出，凡是對國際音標有研究ｅ人所附ｅ台語音音值標示，無論是用ㄅ,ㄆ,ㄇ......系統，或者是羅馬字母a, b, c, t, e......系統，除了顯示腔口以外ｅ，攏是仝款ｅ音值，所以真清楚ｅ就是每一個系統攏受著某一種ｅ限制。

    ㄅ,ㄆ,ㄇ......系統受著印刷以及現代一般電腦軟體ｅ限制。雖然目前國小教育攏有教ㄅ,ㄆ,ㄇ......，但這個系統因為教育系統養成ｅ觀念，無人會來用這套做文字系統，另外閣ti現代資訊社會這個系統差不多是無法度插一腳，到小學生學英語ｅ時就必須閣學另外一套k.k.音標，咱為啥麼閣欲用干單ti台灣以外就無人欲使用ｅ系統？甘講受過咱目前ｅ教育制度培養出來ｅ人攏會懷念ㄅㄆㄇ系統，m敢來接受abc系統？

    用abc系統ｅ人，雖然攏是用二十六個羅馬字母做基礎，但是猶原爭論不休。甘講咱看未出來，台語音韻ｅ特殊性，致使著每一個派系產生了某一種方面ｅ缺點，就親像頂面講過，咱受著工具ｅ限制。因為台語ｅ音韻內面ｅ塞暴音(stops/plosives)包含了有聲和無聲ｅ音，無聲ｅ音又閣有送氣和無送氣，按呢攏總形成了/b/, /pH/, 和 /p/三個音位註[1]。對咱來講，真不幸ｅ代誌是其他仝款使用abc系統ｅ歐洲國家並無這款ｅ問題存在，咱所受ｅ華語教育嘛無這個問題存在。台語ｅ這個特殊ｅ系統致使著用abc系統ｅ標音一旦抵著融合英語教學問題ｅ時就產生一寡問題。當然猶有鼻母音的問題以及聲調ｅ問題，這二個問題就卡未牽涉著英語教學問題，只是各派標音系統ｅ標示看法意見無仝所引起ｅ。

聲調問題

    台語聲調ｅ音值，各派ｅ看法差不多攏是仝款，但是ti標示上就有真大ｅ出入，攏總是會引起無仝派系ｅ批評，這是因為標示ｅ觀點無仝引起ｅ，可惜攏無聽人ti leh探討這個問題，只是互相批評對方ｅ「錯誤」而已。

    咱會凍分做重音系統以及五點制系統二種來講，基本上這二種系統ti基本標示觀點是無仝，所採用符號外形攏十分類似，因此所表達ｅ音值就會有出入，親像仝款是45度斜線重音系統[ @]和五點制系統[ˊ]，音值表示頭前是高降調，後壁是升調；仝款是135度斜線ｅ重音系統[ $]和五點制系統[ˋ]，一個是低降調，另外一個是高降調。會凍講是互相衝突ｅ系統，當然也引起了無啥麼必要ｅ論戰。當然，用數字表示嘛逃避不了某一方面ｅ批評，只有八聲算法無仝順序ｅ無去掃著，因為伊m是ti台灣ｅ人士所製造出來，當然就脫離戰圈。

文字ｅ問題

    文字ｅ爭論是上大ｅ，相信本文稿所使用ｅ文字也會成為文字ｅ爭論。咱總是會凍真明顯看出，台語文字ｅ派系也是非常ｅ濟，自純漢字派到純拼音派攏總有，純漢字派內面也有派系存在，純拼音派嘛是免不了有派系存在，共同ｅ特點攏是無欲包容其他ｅ派系，互相批評對方，而且堅持自己才是對ｅ，親像本文稿出現上濟ｅ常用字「ｅ」字，就有各種ｅ寫法，當然各派有各派ｅ理由，嘛有政治心理因素存在ｅ，親像「ｅ」字，大部分ｅ台語運動者攏無啥麼愛用「的」，因為in攏有無仝ｅ理由，但是我相信若是台語詞「我的課本」和「你的椅仔」用按呢來表示，相信無人會將「的」讀做「目的」ｅ「的」，當然這篇文稿所寫ｅ「ｅ」若是攏總替換成「的」，相信百分之九十以上ｅ「的」嘛未去讀成「目的」ｅ「的」，嘛未影響著這篇文稿ｅ意義傳達。

    另外，上可憐ｅ代誌是，大部分ｅ派系堅持者並無真正完全用台語來寫作，甚至連寫批評文章也仝款用華語，咱確實著愛煩惱台語本身ｅ未來，台語詞彙ｅ保存欲按佗位來呢？如果連台語ｅ先鋒者就無啥麼敢完全來用台語表達家己ｅ想法，按呢欲叫對母語拯救運動無啥麼感覺ｅ人來注重台語呢？

    就以這次ｅ會議來講，咱會凍來統計本次會議所用ｅ語言，若是除了這篇無算論文又閣無外大ｅ學術價值ｅ文稿並無其他ｅ台語文章ｅ話，咱確實愛為台語ｅ復興前途感覺耽憂，如果每遍ｅ學術會議攏親像派系批評大會，按呢甘猶有外(偌)大ｅ意義。若按呢，咱實在m知也台語ｅ未來發展欲按佗位去定位。

語言標準化ｅ問題

    ti台灣教育閣出現一個特殊ｅ現象就是標準化ｅ問題，ti咱ｅ教育內底無形中，咱攏會有「標準」出現，親像「標準國語」變成咱學習官話ｅ標準，發音無準ｅ會hoo人笑，到底這會hoo人笑ｅ問題按佗位來產生？是教育制度ｅ問題？是教學者ｅ教學心態問題？學習者ｅ根本學習態度？ti遮無欲探討，總是真明顯ｅ是這款ｅ「標準」化已經產生了真大ｅ影響，使得講「國語」無標準會hoo人笑；還頭想欲學習母語ｅ人講未輪轉驚hoo人笑；連學英語也是仝款學kah m敢講嘴講英語，原因只是驚去講m對會hoo人笑。無形中每一個人攏去hoo「標準」束縛著leh，致使著咱真濟學生朋友失去了信心。

    現在母語ｅ教育是m是閣欲踏向「標準」這個問題否？假使欲閣踏向「標準」化，是m是其他無達到「標準」ｅ語音就變成「矮級」化？是m是無夠「標準」又閣是hoo人恥笑ｅ對象？

    若是以語言學來講，每一個人所講ｅ語言攏是平等e，根本無階級之分，所以ti教育過程中應該愛尊重個別ｅ差別，未凍去「矮化」某一款ｅ個別差異，若無，因為「標準」問題去傷害著其他無「標準」ｅ人ｅ自尊心和自信心ｅ循環就未停止。

語言使用心態ｅ問題

    ti咱這個台灣有一個語言使用心態是非常奇怪ｅ一項代誌，相信每一個參加會議ｅ人士基本上ti華語和英語ｅ程度攏猶算未歹，我嘛相信在場ｅ每一個人可能除了極少數ｅ人以外，大部分ｅ人嘛攏會曉講台語，但是真奇怪ｅ一項代誌是，咱絕大部分ｅ人ti會議中自然而然攏會用華語來講，顛倒ti會議上若講台語ｅ人加減會受著人ｅ批評(是按怎無人建議用同步翻譯？)，ti無形中hoo人感覺華語才會凍ti正式會議上出現，台語猶原未凍有平等ｅ地位仝款。假使連這種欲挽救台語ｅ會議就會排斥台語主講ｅ話，按呢，是m是代表語言使用心態就有問題呢？

    另外，咱猶有一個奇怪ｅ心態是：若有一個美國人講伊未曉講英語，咱會感覺是無可能ｅ代誌；若是一個日本人講伊未曉講日本話，咱會感覺想未到；若是一個香港人講伊未曉講廣東話，咱會感覺是笑諧ｅ代誌；若是一個客家人講伊未曉講客話，咱有時會感覺奇怪；但是為啥麼咱台灣人ｅ少年家講伊未曉講台語ｅ時，咱會無啥麼感覺，未感覺這是見笑代，甚至感覺這是真正常ｅ代誌。仝款ｅ類似情形，咱若是ti美國住上三年轉來台灣，咱若是未曉講英語一定會hoo人笑；若是ti日本仝款住有三年轉來，若未曉日語嘛會hoo人笑；但是為啥麼外省人住欲五十年ｅ台灣未曉講台語未hoo人笑，咱顛倒愛來遷就in咧？

鄉土教育ｅ問題

    自今年新學年度開始鄉土教育就開始欲全面實施，咱攏真清楚母語教育ｅ師資實在是非常ｅ欠缺，干單經過一個禮拜ｅ母語訓練就開始教母語。ti一個機緣之下，認識一個母語教材ｅ負責編寫人，伊干單經過一禮拜ｅ母語訓練就擔負這個重擔。這實在是有真大ｅ問題，更加閣卡免講無受真好ｅ專業訓練，將來欲擔任母語教育ｅ教師。相信咱每一個研究台語ｅ人攏真清楚，台語本身ｅ音韻有連音變調、三連音變調、二字強調連音變調、仔字尾前音變調、輕音問題......等等，干單遮ｅ問題是無可能ti一禮拜ｅ訓練就會凍完成做為一個專業人士，尤其是聲調ｅ確認就愛經過一段真長ｅ訓練才會凍正確來掌握。所以，咱真正愛懷疑這款情形所寫出來ｅ母語教材ｅ品質甘受會起鄉土教育ｅ考驗。

    另外，我個人也曾經參加過某縣ｅ鄉土教育研討會，ti一禮拜ｅ課程中，母語教育ｅ部分只佔二點鐘，其他ｅ主講者所用ｅ語言攏是華語為主，咱是m是愛耽心。母語教育正式實施了後，是m是學校ｅ主講者嘛是攏用華語主講，甚至將台語詞「桌仔」、「椅仔」和「室仔」嘛用華語發音講『ㄓㄨㄛㄗㄞˇ』、『ㄧˇ ㄗㄞˇ』和『ㄕˋ ㄗㄞˇ』。若是真正有這種ｅ情形發生，這甘會凍算講是台語鄉土教育？

鄉土教育ｅ教學時數問題

    講著教學，上現實ｅ就是時數ｅ問題，咱攏清楚ti目前ｅ教育制度，若單純講中文課ti私立學校已經增加到一禮拜有八點鐘ｅ課，但是以語言ｅ角度來講，學生可以講每一節攏是ti華語ｅ環境內底。本土教育猶原嘛會凍有類似ｅ課程，親像台灣地理、台灣歷史、台灣本土生物、台灣民俗活動、台灣民間歌謠、台灣戲劇、台灣美術、台灣文學......等等，會用講仝款是應有盡有。若是一禮拜干單兩點鐘ｅ鄉土教育，甘有法度深入包含遮濟內容？若是母語有伊ｅ公平地位ｅ時，教育時數是m是嘛愛有差不多ｅ時數？

政治「統一」問題

    語言一向攏會無辜ｅ牽涉著政治問題，為著某一種ｅ政治原因，語言永遠脫未開政治ｅ魔爪，真單純ｅ日常生活語言一旦hoo有心ｅ政治人士戴某一種「政治罪名」ｅ帽仔，就會引起語言生存爭奪戰ｅ戰爭，政治弱勢ｅ語言無形中有可能因為政策ｅ關係來失傳。因此，失傳ｅ語言hoo某一個優勢語言來代替，一旦語言代替完成，政治自然無形中就統一起來。就以台灣來講，除了主張台灣獨立建國人士以外，無論海峽這方面或是對面，攏一直講咱是一個省份而已，附屬ti秋海棠ｅ「版圖」內面。

    ti咱ｅ教育內面，無論歷史、地理、中文，一再灌輸咱是彼爿ｅ一部分，無論血緣、地緣攏是來自彼爿，理所當然愛講彼爿政治中心為基本ｅ話----「國語」。當然ti政策ｅ推動之下，「國語」ｅ政策非常成功，除了少數人以外，大部分ｅ人已經是無形中是這個「五千年歷史國家」ｅ子孫，ti心態上已經是屬ti秋海棠內底ｅ人。會凍講咱已經無形中ti心內去hoo人「統一」了，只是無承認而已。如果咱ｅ母語到咱這一代無形中失傳，咱台灣人ｅ語言身份證自然就去失落去，欲按怎形成自主自立ｅ所在呢？咱若是彼爿ｅ一份子，當然咱若ti目前仝一個「國語」環境之下ｅ政治團體，咱只不過是一個「內亂」而已。

結論

    本文稿上頭前有講過，這篇m是論文，只是一篇古井仔水蛙ｅ論調，並且希望本文是一篇一派胡言ｅ文章，但總是希望咱ｅ母語會凍受著大家共同來打拼，提出包容ｅ心，就親像台語本身存在著泉腔和漳腔兩大系統，由這二個系統透濫ｅ各種程度ｅ漳泉濫共同存在ti這個島嶼。

    當務之急是母語需要繼續生存發展，提出實際ｅ行動來推動，hoo注重母語ｅ觀念會凍深入咱每一個少年人ｅ心中，更加hoo少年人ti以後成家立業了後會凍願意繼續以傳教母語為榮，若無母語ｅ流失量是非常驚人，無人願意傳承教育下一代，母語真緊就會死亡，族群ｅ身份證也會消失去，就親像鶴佬客仝款，ti語言文化已經是鶴佬人，只有族譜ｅ血統講in是客人，雖然血統無變，但是語言和生活文化已經是同化，會凍講in客人ｅ身份消失去，只是因為血統無變，為著區別自己ｅ身份才特別稱呼家己是鶴佬客。

    最後，無論這篇文稿是m是有機會來正式發表，再度感謝董忠司 教授ｅ邀稿，希望咱ｅ母語會凍閣進一步受著重視，咱ｅ鄉土教育會凍推展了真順序，更加希望咱停止無必要ｅ派系之爭，共同來為母語ｅ將來打拼，只要台語使用ｅ人口會凍閣再回升，自然而然，語言歷史ｅ演變自然就會來決定一切，就親像英語起初拼法ｅ混亂，但經過一段時間ｅ考驗就穩定成咱目前所看ｅ情形了。

1997.05.04

後記：

    這遍ｅ會議ti 六月六日 以及七日ti新竹師院舉行，攏總有三十五個人發表論文，三十五篇內面只有四篇是台語文，發言時，有六個是用台語發言，自按呢來看，先鋒者ｅ使用%數無夠百分之二十，台語ｅ前途確實愛煩惱。雖然 洪惟仁 先生ti會中發展論文也有講起台語目前猶有50%的生命力存在，伊也認為真無樂觀。伊ｅ論文調查是伊ｅ學生去做調查，但是並無分析年齡層ｅ分佈情形。咱愛知母語ｅ保存是愛靠新一代來保存和生湠才有可能繼續生存落去，若無，母語隨時會來死亡。

    會中，洪 先生一開始講一個笑話，講咱若欲hoo台語生存落去，咱愛想辦法hoo新ｅ一代未生出來，老ｅ一輩愛想辦法食卡長歲壽咧。

    假使先鋒者只存無20%，按呢台語ｅ實際生命力有可能存無10%，雖然咱猶真樂觀講講台語ｅ人口猶佔85%以上，但是ti後浪推前浪，一代新人換舊人了後，「台語」這個名詞內涵可能愛重新定義做無仝款ｅ解說了。

1997.06.22

【註】

        本文原來是用台音式拼音，現在改為教育部公佈ｅ系統，ti文章ｅ寫作上，無標調起li是因為個人認為無標調ｅ文章並無對文章ｅ解讀上有真大ｅ障礙ti咧。

1998.06.24

(轉去歡喜講台語的目錄)