宜蘭阿姊的部落格

台灣母語聯盟大會成立記事

2010年的2月21這工，是台灣母語聯盟成立大會的日子。早起9點，有真濟工作人員來到台灣石油工會的10樓會議室，並照事先分配好的職務就位，連來起鼓鬥鬧熱的台灣唸歌團團員嘛攏來佇咧準備。

9點半才到，會場佈置有一个坎站矣，報到組佮接待組鬧熱kah秩序組嘛過來鬥跤手；議事組、選務組佮總務組，沿路溝通沿路進行欲開大會的事工；各組的組員攏拍拚佇執行家己所分配著的工課；唸歌團按照時間主動起去舞台頂，用5支月琴合奏出咱攏真熟悉的台灣歌謠，親像滿山春色、白牡丹、四季紅、農村曲、忘春風、工义譜，佮快樂的出航等。佇好聽佮優美的旋律中，來報到的會員愈來愈濟。

當出席的會員差不多有夠開會的人數時，唸歌團的演奏佇眾人的phok仔聲來完成，大會主席李勤岸隨宣佈正式開會，並紹介來賓，包括有國語會執行秘書陳雪玉、羅榮光牧師、民進黨社運部李世明，佮法官退休的葉賽鶯，煞落，邀請來賓佮大家同齊翕團體照，並遵照大會手冊程序繼續進行。佇大家認真討論大會章程的時，台北市議員徐佳青嘛來捧場。

因為欲清楚界定聯盟本身的性質佮功能，佇章程討論的時，咱毋單逐條讀，連用詞用字咱嘛真斟酌，使致時間有tshiân(延)著，佳哉，有 鳳珍 老師用伊「機關槍」的速度，予咱的章程順序來達成。

閣來的理、監事選舉，大家的跤手攏真猛，選務組的工作人員更加是「早就準備佇等矣！」

照章程的規定，咱的理事是15个名額加2个候補，監事是5个加1个候補。監事選舉真緊就開票出來，阿理事就加較長的時間才開煞！

理、監事選舉的結果一公布，遵照議程，咱繼續召開第一屆第一次的理監事聯席會議，並且進行常務理事、常務監事佮理事長的選舉，待遮的職位人選攏確定出來矣，第一屆理事會就佮籌備會辦移交，了後，理事長就提出聯盟的工作人員名單，包括祕書長、會計、出納，並得著聯席會通過；最後，決定會址，嘛決議欲進行社團法人的登記。

2010年的「世界母語日」，佇台灣，咱大家親身來成立台灣母語聯盟，並且認真界定咱的身份，會使講，咱肯定家己，毋單對聯合國的母語日做出具體的呼籲，咱嘛知影，按這工開始，咱會拍拚來捒復振台灣母語這條辛苦的路。

台灣母語聯盟

祕書長  李芳玲

tī 2010/02/28

2009新竹縣國際花鼓藝術節婆婆媽媽打擊樂演出之一 --- 煞猛來打拚 http://www.youtube.com/watch?v=jg5DWLe6HN0 ...《 詳全文 》

1. 園長致詞+秋風亭   http://www.youtube.com/watch?v=YktLVpquN84   2. 勸世歌 http://www.youtube.com/watch?v=-BPphBtMrwc   3. 客家七字仔調 http://www.youtube. ...《 詳全文 》